મોડાસામાં ઉજવાઈ "વૈદિક હોળી ભરતીય સંસ્કૃતિમાં પરંપરાગત ચાલી આવતા હોળીનો તહેવાર દરેક શહેર ગામેગામ મહોલ્લા શેરી કે સોસાયટીઓ વચ્ચે હોળી પ્રગટાવાય છે. આપણી ભારતીય સંસ્કૃતિમાં ઋતુકાળના વાતાવરણને અનુરૂપ તહેવારોની ઉજવણી થતી આવી છે.પરંપરાગત ચાલી રહેલ આ હોળી પ્રાગટ્ય એ તો વાસ્તવમાં આપણી સંસ્કૃતિની યજ્ઞ પરંપરા મુજબ આ ઋતુમાં પાકેલ નવીન અનાજને અગ્નિમાં સામુહિક હોમ કરવાનો ઉત્સવ સસ્યેષ્ટી યજ્ઞ છે. પરંતુ હોળીકા અને ભક્ત પ્રહલાદ જ્યારે આ ચાલી સસ્યેષ્ટી યજ્ઞમાં બેસવાની ઘટના બાદ આને હોળીના નામથી ઊજવાતી ગઈ.ગાયત્રી પરિવારના અગ્રણી હરેશભાઈ કંસારાએ જણાવ્યાનુસાર આપણી મૂળ પરંપરા જાગૃત થાય તેમ પ્રયાસ રુપે મોડાસામાં ગાયત્રી ચેતના કેન્દ્રની જીપીવાયજી યુવા ટીમ દ્વારા સસ્યેષ્ટી યજ્ઞ રુપે શુદ્ધ અને પવિત્ર વૈદિક હોળીનું આયોજન કરવામાં આવ્યું. ૧૩ માર્ચ ગુરુવારે સાંજે ગાયત્રી ચેતના કેન્દ્ર આગળના મેદાનમાં આ વૈદિક હોળીમાં નવયુગલો ધ્વારા પૂજન વિધિ સાથે વૈદિક મંત્રોચ્ચારથી શુભારંભ કરવામાં આવ્યો. અખંડ દીપકમાંથી અગ્નિ પ્રગટાવી હોળી સાંજે સાત વાગે પ્રાગટ્ય કરવામાં આવી. આવનાર સૌને ગાયત્રી પરિવાર દ્વારા પડિયામાં હિમાલયની જડીબુટ્ટીઓ યુક્ત હવન સામગ્રી નિ: શુલ્ક આપવામાં આવી. હજારોની સંખ્યામાં માનવ મહેરામણ ઉમટી આ પવિત્ર વૈદિક હોળીમાં મંત્રોચ્ચાર સાથે આહુતિઓ અર્પણ કરાઈ. ઉપસ્થિત સૌએ પોતપોતાની માન્યતા અનુસાર પવિત્ર વસ્તુઓ હોમી. આ તમામ માનવ મહેરામણ આ વૈદિક હોળીની પરિક્રમા કરી ધન્યતા અનુભવી.
વૈદિક હોળી યજ્ઞમાં ગાયના છાણાંમાંથી બનાવેલ ગૌ કાષ્ટ, ગાયનું ઘી, ગાયના છાણાં-ઓરાયા, આંબો, પીપળી, વડ, ખેર, ઉમરો, ખાખરો ,બીલી જેવાં વૃક્ષોની સમિધાઓ, સાત પ્રકારના ધાન્ય, ગુગળ , ઈલાયચી, લવિંગ, કપૂર, શ્રીફળો તેમજ હિમાલયની જડીબુટ્ટીઓ યુક્ત હવન સામગ્રી આ વૈદિક હોળીમાં હોમવામાં આવ્યું. જે આપણી સંસ્કૃતિના મૂળ મૂલ્યોને ઉજાગર કરી સૌને પવિત્ર હોળીના મહત્વની પ્રેરણા મલી શકે તેવી પવિત્ર ભાવનાથી આ વૈદિક હોળી મનાવવાનું આયોજન કરવામાં આવ્યું.
